مسرحية يونان مسرحية جميلة جداااااااااااااااااااااااا بجد

مسرحية يونان




الشخصيات: الحوت تيتو – مراته توتة – يونان – صوت الله


الفكرة: يونان يحكى للحوت حكايته

المسرحية


تبدأ المسرحية بصوت "زغطة"
- إإ ....إإ....إإ
- مالك يا تيتو انت عندك زغطة ولا ايه
- ايوه ..إإ... انا بلعت حاجة غريبة كبيرة قوى
- يعنى ايه!! سمكة كبيرة يعنى طيب ما احنا طول عمرنا بناكل السمك والأعشاب بس عمرك ما جالك زغطة بالشكل دا
- لا انا حاسس ان دى مش سمكة ..إإ.... بقوللك حاجة غريبة
- حاجة غريبة زى ايه يعنى هو فيه ايه فى البحر غير السمك
- دا زى ما يكون ..إإ.... زى ما يكون ...إإ ... راجل !!!
- هاهاهاهاها راجل ايه بس يا تيتو انت باين عليك تعبان النهاردة، والراجل اللى انت بلعته دا جه منين بقى يا ترى وقع من السما ولا عايش فى البحر...
- ما تتريئيش يا توتة انا بقوللك بجد دا راجل انا متأكد وليه ايدين ورجلين كمان دى مش سمكة ابداً
- انت ابتديت تقلقنى يا تيتو مش الناس بتعيش على الأرض ومافيش ناس بتعيش فى المياه احنا بس الحيتان والسمك اللى بنعيش فى المياه
- استنى كدا انا سامع صوت صلاة جاية من بطنى،،، الراجل دا شكله بيصلى لربنا
- سمعنى كدا انا مش سامعة حاجة
- وانتى ح تسمعى ازاى.... اوعى كدا... هو فى بطنك ولا فى بطنى اوعى كدا يا شيخة
- ماشى يا تيتو انا ح اوعى بس خللى بقى الراجل يوجع لك بطنك عشان انت مش بتاكل بنى آدمين
- طيب استنى تعالى لما نكلمه ونفهم منه ايه حكايته بالضبط: يا.... يا.... يا استاذ .... يا عم .... يا راجل انت ياللى فى بطنى ..... انت سامعنى
- مين حد بينادى
- ايوه ... انا الحوت اللى بلعتك انت ايه اللى جابك فى البحر بتاعنا وفى الحتة الغويطة دى
- ياااااااه دا انا حكايتى حكاية
- انت اسمك ايه
- انا اسمى يونان وانت
- انا الحوت تيتو، وانت كنت رايح فين يا يونان وايه اللى جابك فى البحر هنا
- انا ح احكيلك: اناربنا كلمنى وقاللى:
(صوت موسيقى تخيل) وصوت ربنا بيقول:
- يا يونان انا عايزك تروح بلد بعيييييييدة اسمها نينوى عشان الناس اللى هناك مش بيسمعوا كلامى وهما ناس أشرار ووحشين وانا زعلان منهم قوى
- طيب.... وانا ح اروح أعمل ايه يا ربى
- تروح تقولهم ان انا زعلان منهم خالص وإن ما بطلوش يعملوا الشر انا ح ابوظ لهم المدينة بتاعتهم كلها.
- آآآ.... طبعاً يا ربى انا ح اروح... حاضر
(نرجع تانى للحوت ويونان وهو بيحكى له):
- وقلت فى سرى ان ربنا طيب وحنين و ح يسامحهم وانا لو قلت لهم ان ربنا ح يدمر مدينتهم وهو سامحهم وما عملش كدا ح يفتكرونى بضحك عليهم. فقلت لنفسى انا احسن حاجة اعملها ماأروحش نينوى واهرب من ربنا و....
-يقطع الحوت كلامه: بتقول ايه تهرب من ربنا انت بتقول ايه هو فيه حد يقدر يهرب من ربنا دا ربنا شايفنا على طول فى اى مكان نكون فيه وعمره ما بيسيبنا أبداً وبعدين مهما هربت ح تروح على فين بقوللك ربنا شايف الدنيا كوووووولها. المهم يا سيدى وبعدين
- وبعدين ركبت على المركب دى اللى كانت رايحة بلد بعييييييدة قوى اسمها طرشيش.

- إيه طار مالشيش هو مين دا اللى طار مالشيش
- طار مالشيش ايه بقوللك طرشيش ...... طرشييييييش
- آآآآآآه طرشيييش، وبعدين
- وبعدين أول ما ركبت المركب لاقينا ريح جامدة خالص خالص والبحر هايج جداااا جدااااااا والناس بقوا كل واحد عمال يصلى ويقولوا الحقونا المركب ح تتكسر الحقوناااااااا والمياه دخلت جوه المركب والناس قعدت ترمى شنطها عشان المركب يخف وبردو مافيش فايدة المركب عمالة تطلع وتنزل، تطلع وتنزل.
- يا نهار ابيض وانت عملت ايه
- انا.. هاهاهاها .... انا كنت نايم فى المركب فى حتة كدا تحت وكنت نعسان جدااااا ومش دريان بحاجة
- نعم!!!!!!!!! ازاى وسط دا كله كنت نايم يا يونان انت شكلك مش بتسمع الكلام ومش مهتم بأى حاجة خاااااالص.
- ماهم صحونى وخضونى وقالوا لى ايه دا انت إزاى نايم وسط دا كله مش حاسس بأى حاجة قوم صلى لإلهك يمكن يخلصنا من اللى احنا فيه دا ومانموتش كلنا !!!! وقالولى كمان ح نعمل قرعة عشان نشوف مين السبب فى ان البحر هايج بالشكل دا
- يعنى ايه قرعة يا يونان
- يعنى كلنا نكتب اسامينا فى ورق ونطبقه وماحدش يشوف الاسامى ونلخبط الورق كله وواحد يختار ورقة والاسم اللى ح يطلع فى الورقة يبقى هو دا السبب فى هيجان البحر.
- والقرعة وقعت على مين بقى يا ترى
- وقعت علىً
- وبعدين رموك فى البحر
- لأ قبل ما يرمونى فى البحرسألونى انت منين وعملت ايه عشان تبقى انت السبب فى هياج البحر قلت لهم انى ماسمعتش كلام ربنا وانى هربت منه فخافوا خالص وقالوا لى طيب نعمل ايه عشان البحر يهدأ وانا اللى قلت لهم ارمونى فى البحر ...... بس تعرف يا تيتو!! أول ما رمونى فى البحر بطل هيجان
- انت عارف يا يونان انا ح اقوللك على حاجة عشان تعرف انك مهما عملت ربنا بردو بيحبك انت عارف ان ربنا قاللى اسمع يا تيتو روح بسرعة فى الحتة دى عشان فيه واحد انا بحبه فى البحر ولو فضل فى البحر ح يغرق.... وكمان خليه فى الجيب اللى فى بطنك الكبييييييييرة قوى دى عشان انا عايزه يتعلم انه مايقدرش يهرب منى أبداً
- يااااااااه معقول انا مكسوف قوى من ربنا وانا كمان ح اقعد اصلى عشان يسامحنى
- ايوه ما انا سمعتك وانت بتصلى دى صلاة جميلة قوى، كنت بتقول ايه انا نسيت
- دعوت من ضيقي الرب فاستجابني. صرخت من جوف الهاوية فسمعت صوتي
- الله يا يونان دى صلاة حلوة قوى ممكن تحفظهالى
- طيب قول ورايا دعوت من ضيقى.........
- دعوت من ضيقى........
- حفظتها يا تيتو
- ايوه يا يونان دى حلوة قوى وح اصليها على طول عشان ربنا يقف معايا فى كل حاجة
- بس يا ترى ح اقعد أد ايه فى بطنك يا تيتو
- ما اعرفش لما ربنا يقوللى اخرجك ح اسمع كلامه لانى مطيع وح اخرجك على طول
- انا ح اقعد اصلى لحد ما يسامحنى
صوت يقول: وبعد 3 أيام و3 ليالى:
- يا يونان ....... يا يونان
- ايوه يا تيتو
- اخرج بره انا ح ارميك على الشاطئ عشان ربنا قاللى ارمى يونان على الشط عشان انا خلاص سامحته
- يااااااه الحمد لله .... بس... هو انا بقى لى اد ايه هنا
- 3 أيام بلياليهم
- يااااااه هو انا بقى لى كل دا .. دا انا ما حسيتش خالص ،، انت متأكد 3 أيام و3 ليالى انا اصلى كنت عمال اصلى وما حسيتش بالوقت بعدين كمان انا جوه بطنك الدنيا على طول عتمة مش عارف الصبح من بالليل.
- طيب اخرج بقى يا يونان ..... باى باااااااااااى وابقى اسمع كلام ربنا وقولله حاضر دايماً واوعى تانى مرة تفكر تهرب منه ... بيتهيأ لى انك اتعلمت كويس قوى يا يونان من الدرس دا
- طبعاً انا اتعلمت كويس قوى انى اسمع كلام ربنا على طول
(صوت الله): ياللا يا يونان روح عشان تكلم اهل نينوى وتقولهم ان مابطلوش الشر اللى بيعملوه انا ح أهد المدينة بتاعتهم كلها عليهم
- حاضر يا ربى أنا ح أروح حالاً على نينوى عشان اكلم اهلها زى ما انت قلت لى.


صوت يقول: وفعلاً يا أولاد راح يونان عمل زى ما ربنا قالله وأهل نينوى سمعوا الكلام وبطلوا الشرور اللى كانوا بيعملوها وربنا سامحهم وما هدش المدينة بتاعتهم.






النهاية